OFW Na Sinasaktan Noon Ng Asawa, Ibinahagi Ang Nakakaantig Na Kwento Ng Kanyang Pagbabago

OFW

Kamakailan lamang, maraming naantig at nabilib na mga netizens sa kwento ng buhay na ibinahagi ng isang OFW na si Michelle Valenzuela sa kaniyang socmed account.

Marami sa mga netizens ang nagulat nang makita ang kaniyang itsura ngayon na sobrang layo sa kaniyang itsura noon sa isang litrato na kaniyang ibinahagi kasama ang kaniyang anim na mga anak.

Sabi ni Michelle na siya ay nawalan ng oras upang asikasuhin at ayusin ang kaniyang sarili dahil na rin sa kinakailangan niyang alagaan ang kaniyang anak, gumawa sa bahay, at asikasuhin ang kaniyang asawa na walang ibang ginawa kung hindi uminom at magsugal lamang.

Maliban dito, binahagi din ni Michelle na ang kaniyang asawa ay sinasaktan siya noon at ang masakit pa doon, ito ay nagdadala ng ibang babae sa kanilang sariling tahanan.

Masakit man pinili niyang magpakatatag at lumaban para na rin sa kaniyang mga anak. Umuwi siya sa tirahan ng kaniyang ina kasama na rin ang mga anak nang pinalayas siya ng asawa niya.

Makalipas ang ilang buwan, mahirap man pero siya ay nagpasya na pumunta ng ibang bansa upang makapagtrabaho at makakuha ng mas maayos na sweldo na sapat para mabigyan niya ng magandang buhay ang kaniyang mga anak.

Pagbabahagi ni Michelle na siya ay nahirapan na magtrabaho sa ibang bansa lalo na at hindi pa maganda ang trato ng kaniyang amo sa kaniya ngunit pinili niyang magpakatatag dahil para iyon sa kaniyang mga anak.

Nagpatuloy siya sa pagtatrabaho ng mabuti at nagdasal. Dahil sa tiyaga at sipag na ipinamalas ni Michelle sa kaniyang trabaho, naiba ang turing ng kaniyang mga amo sa kaniya. Naging mabait at mapagmahal ito sa kaniya.

Sa katunayan, kada taon ay sila mismo ang nagbibigay ng libreng package para sa mga anak ni Michelle na naiwan sa Pilipinas.

Ngayon, nabalitaan din ni Michelle na ang kaniyang asawa at kabit nito ay hiwalay na. At siya ay uuwi na rin ng Pilipinas matapos ang pitong taon na pagtatrabaho sa ibang bansa.